ଆମେ ବନ୍ଧୁ

ଆମେ ବନ୍ଧୁ ସଖା ଭାଇ ଓ ଭଉଣୀ

ଯିଏ ଯେତେ ଦୂରେ ଥାଅ,

ହିନ୍ଦୁ ମୁସଲମାନ ଜୈନ ଖ୍ରୀଷ୍ଟିଆନ

ଭେଦଭାବ ଦୂରେଇ ଦିଅ।

ଗୋଟିଏ ମାଆର କୋଳରେ ଜନମ

ତା ପାଣି ପବନ ନେଇ,

ବଢୁଛୁ ବୁଲୁଛୁ ତା କୋଳେ ଖେଳୁଛୁ

ମାଆ ମାଆ ଡାକି ଦେଇ।

ମହାନ ସଂସ୍କୃତି ମହାନ ପରମ୍ପରା

ଆମ ଏ ଭାରତ ଭୂଇଁ,

ନାହିଁ ଉଚ୍ଚନୀଚ ଧନୀ କି ଗରୀବ

ଆମେ ରେ ଭଉଣୀ ଭାଇ।

ଦୁଃଖ ସୁଖ ରୋଗ ଶୋକରେ ସଭିଏଁ

ସଭିଙ୍କୁ ଭରସା ଦେଇ,

ମିଳିମିଶି ଏ ଦେଶ ଜାତିର ଗୌରବ

ବଢାଇବା ଆମେ ରହି।

ଭୁଲିଯିବା ରାଗ ହିଂସା ଦ୍ଵେଷ ଭାବ

ନରଖି କପଟ ମନେ,

ସତ୍ୟ ଧର୍ମ ପଥେ ଆଗୁସରି ହେବା

ଦୟା ଧର୍ମ ଆଭୂଷଣେ।