ଆମ ସଂସ୍କୃତି
ଆମ ସଂସ୍କୃତି
ଭୁଲିଛ ସଂସ୍କୃତି ଆମ ପରମ୍ପରା
ପାଶ୍ଚାତ୍ୟ କରି ନିଜର ,
ଭୁଲିତ ଗଲଣି ଷୋଳଟି ଶୃଙ୍ଗାର
ସେ ସବୁ ହେଲାଣି ପର ।
ନୂଆ ବୋହୂ ପାଦ ରୁଣୁଝୁଣୁ ଶବ୍ଦ
ଆଉ କାନେ ଶୁଭେନାହିଁ ,
ଗୋଡ଼ର ଝୁଣ୍ଟିଆ କିଏ ପଚାରୁଛି
ପାଦରେ ପାଉଁଜି ନାହିଁ ।
କର୍ଣ୍ଣଫୁଲ କର୍ଣ୍ଣେ ଶୋଭା ପାଉନାହିଁ
ନାକକୁ ସାଜୁନି ନୋଥ ,
ବାହୁବନ୍ଧ ସତେ ଉଭେଇ ଯାଇଛି
ପିନ୍ଧିଲେ ଲାଗେ ଅସୁସ୍ଥ ।
ଗଳେ ମଣ୍ଡୁନାହିଁ ଗଳାହାର ଆଉ
ସୀମାନ୍ତରେ ନାହିଁ ସିନ୍ଥି ,
ଶଙ୍ଖା, ଚୁଡ଼ି ହାତେ ଶୋଭା ଦିଶୁନାହିଁ
ଲଲାଟେ ନ ଲାଗେ ବିନ୍ଦି ।
କିଏ ପଚାରୁଛି ଗଭାର ଗଜରା
ମୁକୁଳା ପଡ଼ୁଛି କେଶ ,
ନାହିଁ ନାଲି ପାଟ ଅଳତା , ସିନ୍ଦୂର
ଲାଗେ ଭାରି ଅବଶୋଷ ।
ସର୍ବଦା ସମ୍ଭବ ହେଉନାହିଁ ଯଦି
କେବେ ତ ବଞ୍ଚାଅ ସ୍ମୃତି ,
ଆଜିର ରମଣୀ ଆହେ ! ଓଡ଼ିଆଣୀ
ବଜାୟ ରଖ ସଂସ୍କୃତି ।