ଆମ ଘରର ମାନଚିତ୍ର

ବୋଉ କହୁଥିଲା

ମୋର କୁଆଡେ ବଡ ଭାଗ୍ୟ !

ମୁଁ ଜନ୍ମ ହେବା ସନ

ସୁଝାହେଲା ସାଉକାରର ପଇସା,

ବନ୍ଧା ପଡିଥିବା ଦୁଧିଆଳି କାଳିଗାଈ ଚମ୍ପା,

ଆଉ ପରି ନାହାକ ଠାରୁ

ଢ଼ିଙ୍କିଆ ପାଟ ଜମି ।

ସେବେଠୁ ଆମର କିଛି ଅଭାବ ନାହିଁ।

ପାଠ ପଢି ସିନା ବେକାର ହେଲି

ହେଲେ ଆମ ଗରୀବ ଘର ପାଇଁ

ସରକାର ଖଞ୍ଜି ଦେଲେ       

ତିନିପୁରୁଷ ପାଇଁ ଟଙ୍କିକିଆ ଚାଉଳ,

ବିପିଏଲ/ରାସନ କାର୍ଡ,ବିଜୁ ସ୍ୱାସ୍ଥ୍ୟ ବୀମା,ଲେବରକାର୍ଡ ଭଳି ମାଳ ମାଳ ଯୋଜନା

ମୋ'ଜେଜେ ମାଆ ପାଇଁ ବିଧବା ଭତ୍ତା,

ହରିଶ୍ଚନ୍ଦ୍ର ଯୋଜନା ।

ବାପା ମୋର ଏବେ ଗାଁର କୁଜିନେତା

ପାଞ୍ଚ ବର୍ଷ ପାଇଁ ।  

ଟଙ୍କା ପାଆଂଶରେ ଆମେ 

ବିକିଦେଉ ଆମ ଭବିଷ୍ୟତ ।        

ମୋ'ଭାଗ୍ୟର ତଣ୍ଟିରେ ଶିକୁଳି ବାନ୍ଧି

ସକାଳ ହେଲେ ଧାଆନ୍ତି ବାପା      

ବେକାରି ପୁଅଲାଗି କୋଉ ସରପଞ୍ଚ,

ବିଡ଼ିଓ,ମନ୍ତ୍ରୀଙ୍କ ଦ୍ୱାରସ୍ଥ।

ପରପାଇଁ ଠିକା ନେଇଥିବା         

ବାର୍ଦ୍ଧକ୍ୟଭତ୍ତା,ବିଜୁଳି ଆଲୁଅ

ଅଭାବି ଘର ପାଇଁ କାହାର

ଡିବିଏ କିରାସିନି ।

ସାମର୍ଥ୍ୟ କୁ ଉପହାସ

କରୁଥିବା ଆମ ଦାରିଦ୍ରତା ପାଇଁ

ଏବେ ମୋ ବୋଉ ଭାଗ୍ୟର ଦ୍ବାରସ୍ଥ ।

ଜାତକ ଦେଖି ନାହାକ ଦେଇଛି ପ୍ରତିକାର

ମୋ ବାପାଙ୍କ ଦେହାନ୍ତେ ବଦଳିବ   

ଆମ ଘରର ମାନଚିତ୍ର