ଆଲୋକିତ ଉପବନ

ତୁମବିନା ମୋର ଜୀବନ ଅଧୁରା

ଜାଣିଛ ତ ପ୍ରିୟତମା

ତୁମପାଇଁ ମୋର ହୃଦୟ ତଳେ ଲୋ

ଅନ୍ତହୀନ ସବୁଜିମା I

ତୁମେ ପାଖେଥିଲେ ହୃଦୟ ନଈରେ

ପ୍ରେମର ଜୁଆର ଉଠେ

ତୁମ ପ୍ରେମେ ସଖୀ ଖୁସି ମୁଁ ମନାଏ

ମନ ଦରିଆର ତଟେ I

ତୁମେ ହସିଦେଲେ ହସେ ମୋ ଦୁନିଆ

ତୁମରି ଦୁଃଖରେ ଦୁଃଖୀ

ତୁମରି ମୁହଁରେ ଇନ୍ଦ୍ରଧନୁ ଆଙ୍କି

ସାତରଙ୍ଗ ଦିଏ ମାଖି I

ତୁମ ଆଖିତଳେ ସପନର ଢେଉ

ହୃଦୟେ ପ୍ରେମର ଶୀଳା

ଓଠରେ ତୁମର ଭରି ରଖିଛ ଲୋ

ପ୍ରଣୟର ମଧୁଶାଳା I

ମୋ ଆଖିରେ କେତେ ରଙ୍ଗ ବୋଳିଛ ଲୋ 

ରଙ୍ଗୀନ ଦିଶୁଛ ତୁମେ

ଦୁନିଆର ସବୁ ଖୁସି ଦେଇ ମୋତେ

ଭିଜାଇଛ ତୁମ ପ୍ରେମେ I

ତୁମ ପାଦତଳେ ନିଜକୁ ସମର୍ପି

ତୁମ ନାମେ ଦୀପ ଜାଳି

ପାଳୁଛି ଆଜି ମୁଁ ଆନନ୍ଦ ମନରେ

ନୂଆ ଏକ ଦୀପାବଳୀ I