ଆଲୋ ନନ୍ଦରାଣୀ

ଆଲୋ ନନ୍ଦରାଣୀ ହେଲୁକି ବାୟାଣୀ

କୃଷ୍ଣଙ୍କୁ ବୋଲୁତୁ ପୁଅ,

ନୁହେଁ ପୁଅ ତୋର କର୍ତ୍ତା ବ୍ରହ୍ମାଣ୍ଡର

ସୃଷ୍ଟିର ପାଳନ ହାର ଲୋ ରାଣୀ ।

ପୁତ୍ର ସ୍ନେହରେ ହେଉ ବାୟାଣୀ ଲୋ ରାଣୀ | l

ପୁତ୍ର ପ୍ରେମରେ ହେଉ ଅନ୍ଧୁଣୀ, ଲୋ ରାଣୀ | l

କେଉଁ ଜନ୍ମେ କେତେ ତପସ୍ୟା କରିଲୁ

କୃଷ୍ଣଙ୍କୁ ପାଇଲୁ କୋଲେ,

ଜଗତର କର୍ତ୍ତା ଅନାଦି ଠାକୁର

ତୋ କୋଳେ ଜନମ ହେଲେ ଲୋ ରାଣୀ ।

ମାଆ ଡାକ ତୁ ପାଇଲୁ ଶୁଣି, ଲୋ ରାଣୀ ।।

ସାରା ବିଶ୍ଵ ବ୍ରହ୍ମାଣ୍ଡ ଯା ଗର୍ଭେ ଅଛି

ତାକୁ ତୋ ଗର୍ଭେ ଧରିଲୁ ,

ଅନ୍ତଚିରି ଜାତ କରି ପୁଣି ତାକୁ

ସ୍ତନ ଭାଙ୍ଗି କ୍ଷୀର ଦେଲୁ ଲୋ ରାଣୀ।

କ୍ଷୀର ପିଅନ୍ତି ସେ ବେଣୁପାଣି ଲୋ ରାଣୀ | l

ନିତି ତୋର ହାତେ ସବୁ ସେବା କରୁ

ବନମାଳୀ କାଳିଆକୁ,

ଖେଳାଇ ବୁଲାଇ ନାନା ଗୀତ ଗାଇ

ଦେଇ ସର ଲବଣୀକୁ ଲୋ ରାଣୀ ।

ସ୍ନେହ ଶ୍ରଦ୍ଧାରେ ଭୁଞ୍ଜାଉ ପୁଣି ଲୋ ରାଣୀ | l

ଆଖି ପଳକରୁ କ୍ଷଣେ ଦୁରେ ଗଲେ

ବାତୁଳି ପ୍ରାୟକ ହେଉ,

ଚୋର ନିନ୍ଦା ଶୁଣି ସହିନ ପାରିଣ

କେତେ ମାଡ ଗାଳି ଦେଉ,ଲୋ ରାଣୀ।

ପୁଣି ବୋଲୁ ପୁତ୍ର ମୋ ନୟନମଣି ଲୋ ରାଣୀ. I

ପୁତ୍ର ପ୍ରେମରେ ହେଲୁ ଅନ୍ଧୁଣୀ ଲୋ ରାଣୀ,

ପୁତ୍ର ସ୍ନେହରେ ହେଉ ବାୟାଣୀ ଲୋ ରାଣୀ | l