ଆକାଶ ତୁମପରି ବିଶାଳ

ଆକାଶର ବ୍ୟାପ୍ତି ଭିତରେ 

ନିଜେ ହଜିହୁଏ

ନିଜକୁ ବି ହଜେଇ ଦେଇହୁଏ I

ମୁଁ ତ ହଜି ଯାଇଛି

ସେଇ ବିଶାଳତା ଭିତରେ,

ନିଜକୁ ଖେଜି ଖୋଜି ନପାଇ

ନିରାଶ ବି ହୋଇଛି ଅନେକ ବାର I

ତୁମେ କହୁଛ ଆକାଶ ଦେଖିବ ବୋଲି,

ଖାଲି ଆଖିରେ କେମିତି ଦେଖିବ ଯେ

ଏତେ ବଡ ବିଶାଳତା,

କଣ ଆଖିରେ ଧରାଦେବ?

ତୁମେ ନିଜେ ତ ଆକାଶ ପରି ବିଶାଳ

ନିଜକୁ ନିଜେ ନିରେଖି ଚାହୁଁନ,

ଦେଖିବ ଆକାଶ ଆଉ ତୁମ ଭିତରେ

କିଛି ବି ଫରକ ନାହିଁ I

ସେଥିପାଇଁ ଭାବୁଛି- 

ମୁଁ ବୋଧହୁଏ ତୁମ ଭିତରେ ହିଁ

ହଜି ଯାଉଥାଏ ଥରକୁ ଥର

ତୁମରି ବିଶାଳତା ଭିତରେ

ଆକାଶକୁ ଅନୁଭବ କରେ ମୋ ଭିତରେ

ତୁମେ ଥରେ ତୁମ ଭିତରେ ନିଜକୁ ଦେଖନା,

ଦେଖିବ ଆକାଶ ପରି ତୁମେ କେତେ ବିଶାଳ I