ଆଜିର ଶ୍ରବଣ

ପୂର୍ବାକାଶେ ହୁଏ ନିତି ସୂର୍ଯ୍ୟୋଦୟ

    ଶୁଭଇ ପକ୍ଷୀ କୂଜନ

ମଙ୍ଗଳ ପ୍ରଭାତେ  ବିଞ୍ଚି ହୋଇପଡେ

    ସୁନେଲି ସୂର୍ଯ୍ୟ କିରଣ ।

ଦିନ ପ୍ରତି ଦିନ   ହୁଏ ତୀବ୍ରତର

    ପେଟପାଟଣାର ଚିନ୍ତା

ବଢେ ନାହିଁ କିନ୍ତୁ  ଭୂସୀମା ପରିଧି

     ସଙ୍କୁଚିତ କର୍ମପନ୍ଥା ।

କମିଯାଏ ବଳ   ହୁଅନ୍ତି ଦୁର୍ବଳ

   ବୟକ୍ରମେ ବାପାମାଆ

ପଢୁଥାଏ ଭାଇ ଭଉଣୀଟି ବଢି

   ହୋଇଯାଏ ଘରଯୋଗ୍ୟା ।

ପାରିଗଲା ପୁଅ କାନ୍ଧେ ବହେ ଭାର

   ଛାତିକୁ କରେ ପଥର

ଯାଏ ଦୂର ଦେଶ ଉପାର୍ଜନ ଆଶେ

    ଛାଡି ନିଜ ଘର ଦ୍ୱାର ।

ମାନେ ନାହିଁ ସିଏ ଦିନ ଆଉ ରାତି

    ବୁହାଏ ଦେହରୁ ଝାଳ

ଗଣ୍ଡିଏ ଖାଇକି  ଖଣ୍ଡିଏ ପିନ୍ଧିକି

   ଯୋଗାଇ ଥାଏ ଆହାର ।

ଚଳେ ଗୁଜୁରାଣ  ଜୀବନ ସଂଗ୍ରାମ

   ହସେ ଦୁଃଖି ପରିବାର

ଫେରିବା ପଥକୁ  ଚାହିଁ ରହିଥାଏ

    ନବବିବାହିତା ତାର ।

ଏ ନୁହେଁ କାହାଣୀ  ଅଙ୍ଗେ ନିଭା କଥା

     ସତ୍ୟ ଅଟଇ ବଚନ

ଭେଟିବି ପାରିବା  ପ୍ରତି ଗ୍ରାମ ପୁରେ

     ଅନେକ ଆଜି ଶ୍ରବଣ ।

ଶ୍ରବଣଙ୍କ ତ୍ୟାଗ  ମହାନ ଆଦର୍ଶ

     ଜୀବନର ମୂଳାଧାର

ଏ ଜାତି ବଞ୍ଚିଛି   ମରଣ ହାରିଛି

    ଜୟ ଶ୍ରବଣ କୁମାର ।