ଆଜିର ଚିନ୍ତା ମଣିଷର

ଜାଣ ସବୁ ବୃକ୍ଷ ପାଇଁ ତିଷ୍ଠିଛି

ସମସ୍ତ ପ୍ରାଣୀ ସମାଜ

ତାକୁ ହତାଦର କରି ଭୋଗୁଛେ 

କଅଣ ପାଇଛେ ଆଜ ।

କାନେ ଶୁଣି ନଥିଲେ ଅଭାବ 

କେବେ ଅମ୍ଳଜାନର  

ଯନ୍ତ୍ରଣାରେ ଜର୍ଜରିତ ମଣିଷ

ହୁଏ ଅଣନିଶ୍ଵାସର ।

ଶାନ୍ତି ଯାହା ମିଳୁଥିଲା ଘଂଚ 

ବନାନୀର ତଳେ

ପାଇଛେ କି ତାହା କୁହ ଏ.ସି.ର 

ଘୋଡଣୀ ଭିତରେ ।

ଭୀତତ୍ରସ୍ତ ହୋଇଛି ମଣିଷ ଜୀବନ, କୁହ 

ତୁମେ ପଛେ ଭାଗ୍ୟର ଖେଳ

ଭାବୁଛେ ଖାଲି କେବଳ ପୁଣି ଆସିବ 

କେବେ ସେ ପୁରୁଣା ସକାଳ ।

ଭିଡ଼ ଜମିଛି ଡାକ୍ତର ପାଖେ ଅବା 

ଔଷଧ ଦୋକାନରେ 

ଛାତି ଧଡ ପଡ ହୁଏ ଆମ୍ବୁଲାନ୍ସ୍‍ର 

ସାଇରନ୍‍ ଶବ୍ଦରେ ।

ନିର୍ମାଣ କରିଛେ କେତେ ପ୍ରକାର

ସୁଶୋଭିତ କୋଠା ଘର 

କାହିଁ ଆଜି ସେ ସମୟର ଦୃଢ଼ 

ବିଶ୍ୱାସ ମଣିଷ ଭିତର ।

ହଜିତ ଯାଇଛି ପୁରୁଣା ଦିନ, ତାହା

ହୋଇଛି ସପନ

ଅତୀତ ଗର୍ଭରେ ଲୀନ ହୋଇଅଛି

ରହିଛି ହୋଇ ଚି଼ହ୍ନ ।

ଛକମୁଣ୍ଡରେ ମଣିଷ ଦିଶୁନି, ଖାଲି 

ପୋଲିସର ଗାଡ଼ି 

ଶୋଚନା ଆସେ କେବେ ଭଲ ସମୟ 

ଅାସିବ ବାହୁଡ଼ି ।

ଗରମ ତେଲରେ ମାଛଭଜା ସମ

ମଣିଷ ହେଉଛି ଭାଜି,

ପ୍ରଶମିତ ହୁଏ ନାହିଁ କିଛି ଜ୍ୱାଳାରେ

ତା ସବୁ ବେଦନା ରାଜି ।

ସନ୍ତାପିତ ପ୍ରାଣ, ମଣିଷ ଜୀବନରେ

ଅନଳ ଜଳେ ହୋଇ ଦାଉଦାଉ,

ନାହିଁ ଆମ ଭୁଲର ଥଳକୂଳ, ପ୍ରାଣ 

ଵିକଳ ନିସ୍ତାର ପାଇବାକି ତାହୁଁ ।

ସାନ୍ତ୍ବନା ଅଟଇ ମହୌଷଧି ସ୍ୱରୂପ

ଦୁର୍ଗତି ଦୁଃଖ ସମୟରେ

ଉପଶମ ହୁଏ ଦୁଃସହ ଜୀବନ ଥିଲେ

ବିଶ୍ୱାସ ମନ ଭିତରେ ।

ସମୟ ବଳବାନ, ନୂଆ ଏକ ସମୟର 

ହେବ ଅୟମାରମ୍ଭ

ତୁମ ହାତେ ତୁମ ଭାଗ୍ୟ, ହୁସିଆର ହେଲେ

ବିଷାଦର ଧ୍ୱଂସ ହେବ ।