ଆଇସ୍ କ୍ରିମ୍

ଟିନ୍ ଟିନ୍ ବାଜେ ସାଇକେଲ ଘଣ୍ଟି

ଆଇସ୍ କ୍ରିମ୍ ନିଅ ଆଇସ୍ କ୍ରିମ୍ ,

ପିପରମେଣ୍ଟରେ ତିଆରି କରିଛି

ପାଟିକୁ ଲାଗିବ ଝିମ୍ ଝିମ୍ ।।

କମଳା ରସରେ କମଳା ଦିଶୁଛି

ଓଠ ହୋଇଯିବ ନାଲି ନାଲି ,

ଆମ୍ବରସ ଆଉ ସପୁରୀ ରସରେ

ତିଆରି କରିଛି ଭଳି ଭଳି ।।

ଖିର, ନଡ଼ିଆର ଅଛି ଆଇସ୍ କ୍ରିମ୍

ଲାଗିବ ପାଟିକୁ ସୁଆଦିଆ ,

ଗରମ ଖରାଟା ନରମ ଲାଗିବ

ମନଟା ଲାଗିବ ସରସିଆ ।।

କୁଲୁଫି,ମଲେଇ ଆଣିଛି ଅଳପ

ଖାଇଲେ ପାଟିରୁ ଛାଡିବନି ,

ସ୍ପେଶାଲ ଜିନିଷ ଅଧିକ ପଇସା

ଗଣିବାକୁ ପିଲେ ଡରିବନି ।।

ପେଟ ପାଇଁ ସିନା ଏତେ ନାଟ ମୋର

ଖରାକୁ ମୁଣ୍ଡେଇ ଚାଲିଅଛି ,

ଗରମରେ ସିଝି ଝାଳେ ଭିଜି ଭିଜି

ତୁମ ପାଇଁ ଥଣ୍ଡା ଆଣିଅଛି ।।

‌ଜଲ୍ ଦି ଜଲ୍ ଦି ଚାଲିଆସ ପିଲେ

କିଣିନିଅ ମୋର ଆଇସ୍ କ୍ରିମ୍ ,

ବିକିଦେଲେ ମୁହିଁ ଘରକୁ ଫେରିବି

ଚାହିଁଥିବ ମୋର ରିମ୍ ଝିମ୍ ।।

ବାପ ଛେଉଣ୍ଡିଆ ତିନି ବରଷର

ସୁନା ନାତୁଣୀ ମୋ ଗଳାମାଳି ,

ବାଟରୁ ତା ' ପାଇଁ ଚକୋଲେଟ୍ ସହ

ନେଇଯିବି ଗୋଟେ ପେଏଁକାଳି ।।