ଆହେ ଦୀନବନ୍ଧୁ
ଆହେ ଦୀନବନ୍ଧୁ
( ଆଜି ଜନତା କର୍ଫ୍ୟୁ ଉପଲକ୍ଷେ ଜଗନ୍ନାଥଙ୍କୁ
ଭକ୍ତିପୂତ ପ୍ରାର୍ଥନା କରୁଛି , କରୋନା ଭୂତାଣୁ
ବିନାଶ କରି ବିଶ୍ବର କଲ୍ୟାଣ କରନ୍ତୁ )
........................................................
କେମିତି କାଳିଆ ଦେଖିବି ସେ ରୂପ
ଘୋର କଳିକାଳ ହେଲା
ପହଡ ଫିଟୁନି ବଡ ଦେଉଳରୁ
ଦରଶନ ନ ମିଳିଲା ll 1
ବିଶ୍ବାସ ଭରସା ଗଲାଣି କି ତୁଟି
ଅନ୍ୟାୟ ଅନୀତି ବଢେ
ନୀଳଚକ୍ର ନେତେ ଲାଗଇ ଅନଳ
ଦେଉଳୁ ପଥର ପଡେ ll 2
ଗୋବର୍ଦ୍ଧନ ଟେକି ଗୋପ ରକ୍ଷା କଲ
ବିନାଶି ଅସୁର ବଂଶ
ଯୁଗେ ଯୁଗେ ଧର୍ମ ସଂସ୍ଥାପନ ପାଇଁ
ଅଧର୍ମ କରି ବିନାଶ ll 3
ଆଜି ଏ ଧରାରେ ପୋକମାଛି ପରି
ମଣିଷ ଯାଉଛି ମରି
ଏ ପାପ ନର୍କରୁ ଉଦ୍ଧାର କର ହେ
ଜଗନ୍ନାଥ ଦଇତାରୀ ll 4
କଲା କରମର ଫଳ ଭୋଗୁଅଛି
ଦୟାକର ଦୟାନିଧି
କୃପା ବାରି ତୁମ ଅଜାଡି ଦିଅ ହେ
କୃପାସିନ୍ଧୁ କୃପାନିଧି ll 5
ଏତିକି ଗୁହାରି ଆହେ ଦୀନବନ୍ଧୁ
ଭୁଜତଳେ ଆଶ୍ରା ଦିଅ
କରୋନା ଭୂତାଣୁ ବିନାଶି ହେ ପ୍ରଭୁ
ମାନବ ସୃଷ୍ଟି ବଞ୍ଚାଅ ll 6
ଜଗତେ ଉଡଇ ଉଡୁଛି ଉଡିବ
ତୁମ ଯଶ ଖ୍ୟାତି ଧ୍ବଜା
ଦୀନ ଅକିଞ୍ଚନ ଭଣେ ସହଦେବ
ହାତ ଯୋଡି କରେ ପୂଜା ll 7