ଆଦିବାସୀ ଝିଅ

ବଣମୁଳକର ଆଦିବାସୀ ଝିଅ 

  ମୁହେଁ ତା' ନୀରବ ହସ 

ସଭ୍ୟ ସମାଜ ଠୁ କାହିଁ କେତେଦୂରେ 

   ତା' ଜୀବନ ଇତିହାସ l

ଜଙ୍ଗଲୀ ଝରଣା ପାହାଡ଼ି ଇଲାକା 

  ଅଟେ ତା' ଜୀବନ ରେଖା 

ପରମ୍ପରା ଭରା କଳା ସଂସ୍କୃତିରେ 

  ପରିଚୟଟା ତା' ଲେଖା l

ପାଦ ଦୁଇଟି ତା' କର୍ମେ ଅଗ୍ରସର 

  ନ ରଖି ମନରେ ଆଶା 

ସରଳ ନିରୀହ ଅବା ଶାନ୍ତସ୍ନିଗ୍ଧ 

   ତା' ହୃଦୟ ପରିଭାଷା l

ହାଲିଆ ଅଳସ କ୍ଲାନ୍ତ ଅବସାଦେ 

   ଭୁଲି ଯାଇ ନିଜ ଦୁଃଖ 

ଜୀବନ ଜୀବିକା ଜଞ୍ଜାଳ ଭିଡ଼ରେ 

  ସାଉଁଟେ ସେ ନିତି ସୁଖ l

ପାଶ୍ଚାତ୍ୟ ମହକ ଅବା ଶିକ୍ଷାଲୋକ

  ତା' ପାଇଁ ସାତ ସପନ 

ତଥାପି ସେ ହସେ ପାହାଡ଼ି ରାଇଜେ 

    ଛୁଇଁ ସୁଖର ଗଗନ l