Library
Profile
ଆ' ଜହ୍ନ ମାମୁ
ଆ' ଜହ୍ନ ମାମୁ
ଆ' ଜହ୍ନ ମାମୁ
ବିନୋଦିନୀ ଦାଶ
ଆ' ଜହ୍ନ ମାମୁ ଶରଦ ଶଶୀ
ମୋ କାହ୍ନୁ ହାତରେ ପଡ଼ରେ ଖସି ।
ତୋତେ ପାଇ ଘିରିଘିରି ବୁଲିବ
ସାଥୀ ହୋଇ ଦୁହେଁ କେତେ ଖେଳିବ ।
ଅଝଟିଆ ଆଉ କାହ୍ନୁ ହେବନି
ଯାହା ଦେବି ଖାଇଦେବ ସେ ତୁନି ।
ତୋ ପରି ଉଜ୍ଜ୍ବଳ ଦିଶିବ ଦେହ
ଧନ ମୋର ତୋତେ କରିବ ସ୍ନେହ ।
ତା' ସାଙ୍ଗସାଥୀଙ୍କୁ ଦେଖାଇ ତୋତେ
ଖୁସିର ଲହରୀ ତୋଳିବ କେତେ !
ମୋ କାହ୍ନୁକୁ ଧରି ସଙ୍ଗତେ ତୁହି
ନାନା ଉପହାର ସାଥିରେ ନେଇ ।
ଆକାଶ ଦେଶକୁ ଯିବୁରେ ଚାଲି ।
ଧନ ମୋ ନାଚିବ ଖୁସିରେ ଖାଲି ।
<
p>
ଦେଖାଇବୁ ସେଠି ତାକୁ ତୋ ଗାଆଁ
ବୁଝାଇ କହିବୁ ସବୁରି ନାଆଁ ।
ସାଇତିଛୁ ଯାହା ଯାହା ତୋ ବୁକୁ
ସବୁ ଚିହ୍ନାଇ ଦେବୁ କାହ୍ନୁକୁ ।
ଯେଉଁ ସ୍ଥାନ ତା'ର ଯିବ ମନକୁ
ତା' ନାମେ ଲେଖାଇ ଦେବୁ ତାହାକୁ ।
ବଡ଼ ହେଲେ ସେଠି ତୋଳିବ ଘର
ତୁ ଥିବୁ ତାହାର ଅତି ନିଜର ।
ବୁଝି ଆଜି ତା'ର ମନକଥାକୁ
ଓହ୍ଲାଇ ଆସ ମୋ ଧନ ପାଖକୁ ।
ତୋତେ ପାଇ ହେବ ସେ ସୁନାପିଲା
ସବୁ ଖାଇଦେବ ନକରି ଢିଲା ।
ସାଗରୁ ଜନମି ତୁ ଲକ୍ଷ୍ମୀ ଭାଇ
ଜଗତର ମାମୁ ବୋଲାଉ ତୁହି ।
କୁରୁଆଁ, ମୁଗପାଳ, ଯାଜପୁର
