युद्ध वेदना

युद्धात माणसांचा संहार पहिला मी

स्फोटात पेटलेला संसार पहिला मी

लावू इथे कशाला मी दीप जीवनाचा

सूर्यापुढेच मोठा अंधार पाहिला मी

आधार माणसांना मागू कसा कळेना

दैत्यात मानवाचा अवतार पहिला मी

जीवन स्मशान झाले युद्धात आज माझे

रक्तात माखलेला आवार पहिला मी

शिष्यास काय सांगू आदर्श शांततेचे

शाळेतही रणाचा अंगार पहिला मी

हाका कुणास मारू फैरीत बंदुकींच्या

आकांत जीवनाचा लाचार पहिला मी

माझा कुणा म्हणू मी युद्धात भावनांच्या

पैशात वेदनांचा व्यापार पाहिला मी

घेऊन जन्म झाला माझा गुन्हा विधात्या

साक्षात यातनांचा बाजार पाहिला मी

देहात प्राण असता हृदयात वार झाले

सरणात पेटतांना सत्कार पहिला मी