वसंत आला
वसंत आला
शिशिर ऋतू संपला आता
फुटू लागली नवी पालवी
स्फूर्ती घेऊन वसंत आला
मरगळ मनाची घालवी
पर्णांकुरांनी सजली झाडे
पळसही लालबुंद झाला
रातराणीची फुले सुगंधी
गुलमोहोर फुलुनी आला
फुला फुलांवर भुंगा जातो
मधु चाखण्यासाठी फिरतो
जणू नवा संदेश प्रीतीचा
हळू फुलांच्या कानी घालतो
आंबा काजू फणस फळेही
पाणी आणते पहा तोंडाला
आमराईत कोकीळ बोले
नाचू गाऊया वसंत आला
केसात मोगऱ्याचा गजरा
मदनवारा गिरक्या घेई
प्रेमी हृदये घायाळ होती
प्रीत फुलांना उधाण येई
सृष्टी सजली फुलाफळांनी
दृष्टी बदलून पहा जरा
सरळ मनाने उत्साहाने
वसंतोत्सव करू साजरा