विवाहितेचा छळ

आज सांगते तुम्हा सर्वांना

ऐका एका स्त्रीची कहाणी

पाहत होती स्वप्न बापुडी

संसार करणार होऊन राणी ||

स्वप्न भंगले पडता बेडी

हातामध्ये लग्नाची

केली मागणी आईवडिलांना

सासरच्यांनी हुंडयाची ||

तयार होता हुंडयासाठी

माप ओलांडले सासरी

वर्षाव झाला धमक्यांचा

नाही हुंडा तर जा माहेरी ||

भुकेने ती झाली व्याकूळ

ओठी लागेना थेंब पाण्याचा

नवरादेखील झाला हतबल

रंग बघून त्याच्या आईचा ||

मार, चटके सोसते दिवसभर

डोळ्यातून तरी अश्रू ढळेना

सांगे कौतुक सासरकडचे

दु:ख माहेरी ती कळवेना ||

कसा गेला काळ वर्षाचा

घरात आली पाऊले लक्ष्मीची

मुलगी दिसता समोर झाली

घाई मुलाच्या दुसऱ्या लग्नाची ||

उजाडला तो दिवस भयानक

माय लेकरा होती पाजत

पेट घेतला त्या खोलीने

दोन जीव संपले अकस्मात ||