निरागस प्रेम

आज पहाटे साखरझोपेत 

घेतले अलगद मला कवेत ||

हात फिरवता केसामधूनी 

विरघळले मी लाजलाजूनी ||

आठवणीतही दोघे रमलो 

एकमेकात कधी कसे गुंतलो ||

होतो अनोळखी वर्षापूर्वी

एक दुसऱ्याचे आज आहोत सर्वस्वी ||

इथवर होता प्रवास खडतर 

सुसह्य केला केवळ प्रेमाखातर ||

आडवी आली जात आमची 

नाही किंमत इथे माणसाची ||

नकार आला दोन्ही घरातून 

वाटले व्हावे मोकळे जगातून ||

त्या क्षणी धरला हात सख्याने 

लाभले जीवन खूप भाग्याने ||

आजपर्यंत कधी न सोडला 

दोन्ही घरामध्ये दुवा जोडला ||

आसवांनी डोळे पाणावले 

घेऊन चुंबन हळूच टिपले ||