विरह

किती पाहू वाट आता 

अश्रू सारे सुकले रे 

आटले का ते प्रेम सख्या 

जे माझ्यावर केले रे ||

संयम माझा नकळत सुटला 

लाज सोडली तुझ्या मिठीत 

नाही वाटले मला कधी 

जवळ येईन पहिल्या भेटीत ||

स्वर्गसुखाचा आनंद देतो 

गंध आणि श्वास तुझा 

जरी नसलास जवळ 

तरीही मनातून तुच माझा ||

ओळखते मी तुला राजसा 

तुझ्या अंतरिक श्वासाने 

जरी झाले कधी आंधळी 

ओळखेन तुझ्या स्पर्शाने ||

नाही केले आजवर मी 

प्रेम कुणावर तुझ्याशिवाय 

कळले मलाही नाही अस्तित्व 

कृष्णाचे ही राधे शिवाय ||