लाइब्रेरी
प्रोफाइल
विठू बरस रे...
विठू बरस रे...
1 min
333
ऋतू कोरडा वाहिला
जसा आला तसा गेला
ओल सरली डोळ्यांची
श्वास चातके सोडला...||१||
मैलमैल चाललेल्या
पावलांची पायपीट
वैशाखात पोळूनिया
जमवती घोट-घोट...||२||
मन बाप आभाळाचं
यंदा का गं थिटं बाई
देई चुकारा मेघूट
विरहात काळी आई...||३||
कूस उजवाया तिची
विठू जा रे बरसून
तुझ्या आशेवर श्वास
देई सुगंधाचं दान... ||४||
डोळ्यांतून टिपूसही
आता गळेनासा झाला
माय 'गोदा' हो उशाशी
तरी कोरड घशाला...||५||
वाट माझी मी काट्यांनी
अविचारे सजवली
दोष देऊ कुणा ठायी
श्वासमाला कुस्करली...||६||
पांडुरंगा देई यश
यत्ने पाहतो सावरु
बघवेना ही यातना
चैतन्याचा दे बहरु...||७||
टाक ओंजळीत देवा
थेंब चार मोतीयांचे
दुष्काळाच्या काळोखात
दान देई उजेडाचे !!८!!
