विषवेल

म्हैसाळ गावठाणी राहून आज आले

वृत्ती नराधमांची पाहून आज आले

 

माणूसपण हरावे कृत्त्यास त्या अघोरी

दुःखात पातकाच्या नाहून आज आले

 

विषवेल ती खुन्यांची,फोफावली विखारी

श्रद्धांजली मुक्याने वाहून आज आले

 

कोषातल्या मुलीच्या का मरण या नशीबी?

जखमा तनामनाच्या साहून आज आले

 

कोमेजल्या काठावरी तळ्याच्या कळ्या त्या

अंगाई झोपल्यांना गाऊन आज आले

 

लवकर दयाघना तू धावून येत नाही

मी दोष व्यवस्थेला लावून आज आले

 

आक्रोश दाबलेला,जालीम या रुढींनी

ठिणगी परंपरेला लावून आज आले!