तू गेलास तर...

तू गेलास तर तुला विचारतील 

रिकाम्या हाताने येण्याचं कारण म्हणून तू खूप खूप फिरलास 

नाही कोणी भेटले तुला म्हणून 

मला घ्यायला आलास 

आजकाल खऱ्या माणसांना जगू देत नाही

आणि त्यांना कोणी विचारतही नाही

अरे एका लबाड माणसाच्या जन्मासाठी

तू खऱ्या माणसाचा शोध घेत होतास

फिरून फिरुन शेवटी माझ्या दारी आलास

खरंच सांगतो या माणसांच्या गर्दीत 

तुला प्रामाणिक कमी आणि बेईमानच जास्त दिसले असतील

कदाचित तुझ्यासोबत काही तरी सौदा करून 

मला घेऊन जाण्याचाही सल्ला देत असतील

अरे तू पाहिले असेल खऱ्यांना कोणी विचारत नाही 

कोणी आपले म्हणून घेत नाही

कोणाच्या हृदयातही खऱ्या माणसाला कुठेही जागा नसते 

फक्त खोटी सहानुभूती असते

प्रामाणिक राहुनही

खूप जखमा देतात 

सगळेच कसे काळजावर

घाव घालतात

माझ्या सज्जनतेचा पुरावा तर तुला सगळेच देतील

माझ्या बद्दल चांगलंच बोलतील

पण.....

मी मागणार नाही तुझ्याकडून 

मला घेऊन जाण्याचे आदेश पत्र

आणि तू आला आहेस तर खुशाल घेऊन जा

पण नेण्याआधी विचार त्या देवाला माझ्या जगण्याची मुदत किती शिल्लक आहे

खोट्या माणसांच्या जन्मासाठी खऱ्या माणसालाच का आणायचं हे ही विचारून घे 

नाहीतर माझी विनंती कळव त्या देवाला

खरी माणसं जन्माला

घालू नकोस

कुण्या आईचा गर्भ

शापित करू नकोस