तृप्त घरकुल

एक सदाफली रतीपायी मासोळी घुंगूर

नादतल्लीन झालेला मास अवघा धुंदूर

तृप्त अमृताची पाख लुचणाऱ्याला लाभली

दूधभिजल्या ओठांची फूलकवळी पाकळी

इथे रंगावीन रंगे फक्त तरंग गांधार

इथे गंधावीन गंधे भावसुगंधी लकेर

फुटीतुटीच्या व्यथेला बोट लागे सौहार्दाचे

आसूरुसूंच्या वेलीला गुच्छ फुलते हास्याचे

माझी लेखनाची खोली मधे बाळाचा पाळणा

तारा तापल्यापल्याड तिथे धुंदला तराणा

पकावात शिजलेले नाही पक्वान्न नाजूक

एका भाजीभाकरीत चवी सामावल्या लाख

नाही अलीशान डौल, नाही शहाजादी ताठा

चोहोबाजूंनी धावत आल्या जिव्हाळ्याच्या वाटा

कधी असहाय झाला, अगतिक आला काळ

वाट तुमची पाहील माझे तृप्त घरकूल