स्वातंत्र्य
स्वातंत्र्य
बंधनांच्या स्वातंत्र्याला....
जर मुक्तता झळाळी ,
नको हे अन् ते करू
स्त्रीच्या जुन्या- नव्या काळी !.......१
काय आवड-निवड ?
शून्य किंमत, आदर ,
तुझा फालतूच छंद
जप डोईचा पदर !.........२
नाही कमवत पैसा...
घरी आरामाचे काम ,
ऐकविती सारे नित्य
वाया जाई दाम-घाम !......३
मानसिक कुचंबणा...
सोसूनही उभी पुन्हा ,
जीव वैतागून जाता
मुखी भाव ठरे गुन्हा !......४
सारे लपवून ठेवे....
दावे दुखऱ्या मनात ,
जपणूक यातनांची
सले-टोचे हृदयात !.......५
बोलावेच नच काही...
सांगावेही ना कुणाला ,
यंत्रवत जगताना
झगा आनंदाचा घाला !......६
मिरवून वर शोभा....
किती सुखी संसारात ,
असतील बाण भले
रूतलेले काळजात !...........७
परी हार मानणारी...
अशी नसे तिची ख्याती ,
पेटवून प्रगतीची
जागवेल ज्योत क्रांती !.......८
बदलले तिने रूप....
अंर्तबाह्य तेजस्विनी ,
सर्व क्षेत्र गाजवून
झाली विश्वाची स्वामिनी !......९