संस्कृतीचा झरा

भारतीय संस्कृतीची,

महानता आहे जगी ।

योग अर्पुनी जगाला,

झाले संत योगी जोगी ।।

मान लहानथोरास,

स्नेह अंतरी फुलला ।

वारकरी संप्रदाय,

भाव भक्तीचा भुकेला ।।

कृष्णा सुदाम्याची मैत्री,

राधा मीराईची भक्ती ।

सेवा ती पुंडलिकाची,

अशी महान संस्कृती ।।

आल्या अतिथा पूजतो,

सेवाव्रत घेतो हाती ।

जरी गरीबाची झोळी,

तृप्त करतो अतिथी ।।

नववारी साडी वस्त्र,

कुंकू शोभते ललाटी ।

पतिव्रता धर्मभाव,

नारी सोज्वळ गोमटी ।।

सण उत्सव विविध,

होळी दसरा दिवाळी ।

स्नेह गोडी आपुलकी,

वाजविते सुखी टाळी ।।

सत्य अहिंसा जपुनी,

दिला जगी मूलमंत्र ।

महात्मांची शिकवण,

शत्रू नको, होऊ मित्र ।।

सर्वधर्म समभाव,

हिंदू मुस्लिम ख्रिश्चन ।

राजा जाणता शिवाजी,

सर्वधर्म मंत्रीगण ।।

माझ्या मातीच्या कुशीत,

संस्कृतीचा वाहे झरा ।

सानथोरा मान येथे,

अवमाना नसे थारा ।।

श्रद्धा भाव भक्ती पूजा,

इथे शांततेचा ठेवा ।

म्हणूनच जगालाही,

वाटे भारताचा हेवा ।।