शहीदाच्या मुलाची कविता

कालच तर आपले बाबा

झाले होते ना हो बोलणे

वाढदिवसाला येण्याचे

तुम्ही होतात न म्हणाला।।

किती केली होती मी तयारी 

तुम्ही येणार आहात म्हणून

किती आंनद झाला होता

माझ्या या बाल मनाला।।

पोलिसांची पोर म्हणून

किती मला मिळतो मान

बाबा अभिमान वाटतो

आपला प्रत्येक क्षणाला।।

शाळेत पालक सभेला ही

नेहमी आईच तर यायची

तुमची कमी भासायची 

पण आवरायचो मी मनाला।।

असो दिवाळी अथवा दसरा

बाबा बाहेरगावी असायचे

आम्ही घरी वाट पाहायचो

तुम्ही याल म्हणून सनाला।।

बाबा,केक चा ही ऑर्डर

दिला होता न हो आईने

तितक्यात तुम्ही लावले

बाबा आपले प्राण पणाला।।

  

कधी मनसोक्त नाही खेळलो

बाबा तुमच्या अंगा खांद्यावर

माझ्यावरच आली की पाळी

अग्नी द्यायची तुमच्या तनाला।।