शेतकरी बाप माझा

राब राब शेतात राबून

कडक उन्हात तापतो

माझा शेतकरी बाप

उभ्या जगाला पोसतो //१//

रातदीन डोळ्यात चिंता

उठती विचाराचे काहूर

कधी बाहुलं निसर्गाचा

मन पावसासाठी चिंतातुर //२//

स्वप्न आशेची हृदयात

साठवूनी मनात जागी

घेऊनी आसमंत डोळ्यात

ताळे हिशोबाचे आखी //३//

राबणाऱ्या हातावर

उतरली नक्षी फोड्यांनी

उचलता कर्जाचा भार 

वाहती धारा अश्रूंनी //४//

काय उभ्या जगराहटीत

किंमत मालास कवडीमोल

कधी फेकावं टमाटे,कांदे

 रोगराईने होई पिकाचे फोल //५//

 दिनरात कामतरी कर्जाचा डोंगर

कशी स्वप्न मिळती धुळीस

दुःखाने जेव्हा कळस गाठतो

असह्य बाप माझा लावी गळफास //६//