आठवणीत तुझ्या सजनी
आठवणीत तुझ्या सजनी
आठवणीत तुझ्या सजनी
मन हेलावूनी जाई
गंध प्रीतीचा तुझा
हृदयी साठवूनी राही ||१||
स्पर्श तुझा रेशमी
मन मखमली करी
साथ हवी मज जीवनी
सुखदुःखाच्या वाटेवरी ||२||
तू सोबतीला नाही
मन कसे हे मानीत नाही
आठवणीतील श्रावणधारा
पापण्या ओलेचिंब होई ||३||
तुझ्या आठवणींच्या लाटा
हृदयकिनारी आदळती
तु संगे नाही निराश मन
मनात त्सुनामी उठती ||४||
अंगणातील चाफा जुई
हाक सदा तुज मारी
येण्याची वाट पाही डोळे
दारे खुली ही तिन्ही प्रहरी ||५||
मनाच्या खोल गाभाऱ्यात
पारवा वियोग गाणे गाती
तू नाही पण हरविले घरपण
आठवणी तुझ्या गं छळती ||६||