सैनिक माझे नाव….
सैनिक माझे नाव….
सैनिक माझे नाव मानवा ,सैनिक माझे नाव ,
समरपुर हे माझे गाव, सैनिक माझे नाव ||१||
देशाचा मी तत्पर सेवक, करितो रक्षा सरहद्दीची,
पांग फेडतो मातृभूमीचे,छातीवरती झेलून गोळी ||२||
ऊन, पाऊस, वादळ, थंडी, अंगावरती झेलत वारे,
प्राणपणाने करितो शर्थ,कुटुंबकबिला ठेवून मागे ||३||
पराभवाची धूळ चारतो, तिरंग्याचा मान ठेवतो,
निष्ठूर शत्रू असे जरी, प्रेमाने ही जिंकून घेतो ||४||
एकच इच्छा मनी वसे, परमवीर चक्र स्वप्नी दिसे,
त्या स्वप्नाच्या पूर्तीसाठी, देहत्यागना अधीर असतो ||५||
विजय किंवा वीरगती, ही ललकारी ठरे महान,
धैर्य ,शौर्य अन समर्पणाचे दुसरे नाव शूर जवान ||६||
इंच इंच लढतो भूमी, श्वास असेतो शेवटचा ,
या रक्ताची, बलिदानाची शपथ तुला मानवा ||७||
धर्म, राज्य, प्रांत, भाषा भेदभाव हा करू नका,
सत्य, अहिंसा, प्रेम, शांतता, बुद्ध, बापूंचा मार्ग धरा ||८||
या देशाची अखंडता, संस्कृती अन विभिन्नता,
मोल स्वातंत्र्याचे जाण माणसा, जपून ठेव हा पुण्य वारसा ||९||
पारतंत्र्याचे फेकून जोखड, श्वास मोकळे केले ज्यांनी,
त्या वीरांना, देशभक्तांना त्रिवार वंदन नमन करा ||१०||