परतीची वाट

परतीच्या मार्गावरी 

सूर्य नेहमी असतो

नवी पहाट घेऊनी 

मार्ग नवा दाखवतो ||१||  

शिकलो मी खूप काही 

येणाऱ्या वाटेवरून 

मावळतीच्या सूर्याने

साथ दिली आवर्जून ||२|| 

परतीची वाट म्हणे 

शेवट नसतो मुळी

कर प्रारंभ नव्याने 

लिहिले आपल्या भाळी ||३|| 

अनुभवांची शिदोरी

ठेव कायम सोबत 

वाट मिळेल नवीन 

विश्वास ठेव सोबत ||४|| 

परतीच्या वाटेवरी 

सारे एकत्र चालूया

आनंदी वाट करूनी

मार्ग आपला धरूया ||५|| 

सुरुवात करु नवी

नव्या गोष्टीचा आरंभ

पुन्हा मार्गस्थ होऊनी

करू नव्याने प्रारंभ ||६||