प्रेम

जाऊया हरवून दोघे 

एकमेकांच्या प्रेमात

रंगवू दोघे रासलीला

साऱ्यांच्याच मनात

वाटू नये खंत कधी 

प्रेमी जीवांना प्रीतीची

नकोच वल्गना वंचना

नसावी व्यर्थ भीतीची

रूणझूण तुझे हे प्रेम

जणु पाखरू पाखरू 

जीवलग प्रिया माझी 

प्रेमाला कसे विसरू 

मुखचंद्रमा हा पाहता

फुलतेय ओठी हासू 

नाही पहावणार सखी

नयनातील माझ्या आसू

ओळखीची खूण पहा

घालूनी डोळे डोळ्यात 

चल जाऊया जोडीनेच

फुललेल्या प्रेममळ्यात