Library
Profile
पहिल्या पावसात
पहिल्या पावसात
गंध ओल्या मातीचा मी, अनुभवी प्रत्यक्षात |
आनंदाने भिजलो मी, या पहिल्या पावसात ||धृ||
सूर्य दिसेनासा झाला, आज भरल्या दुपारी |
चहुकडे अचानक, अंधार पडला भारी ||
थोड्याच वेळात झाली, गर्दी ढगांची नभात |
आनंदाने भिजलो मी, या पहिल्या पावसात ||१||
माळ तुटावी मोत्यांची, तशी सर खाली आली |
वृक्ष, पाने, फुले, यांची, चिंबुन आंघोळ झाली ||
थेंब थेंब पावसाने, थंडी भरली अंगात |
आनंदाने भिजलो मी, या पहिल्या पावसात ||२||
पहिल्या पावसाची ही, ओढ प्रत्येकाला राही |
वाट चातका सारखी, शेतकरी सुध्दा पाही ||
सगळे आतुरतेने, वाट याची बघतात |
आनंदाने भिजलो मी, या पहिल्या पावसात ||३||
पावसाळा म्हटला की, येतात डोळ्यासमोर |
कांदाभजी आणि चहा, आवडे लहान थोर ||
मुले मुली सगळेच, आनंदाने नाचतात |
आनंदाने भिजलो मी, या पहिल्या पावसात ||४||
पावसाच्या थेंबामुळे, आज अवनी भिजली |
आनंदाने चोहीकडे, हिरवाईने सजली ||
गंध ओल्या मातीचा हा, भरला आसमंतात |
आनंदाने भिजलो मी, या पहिल्या पावसात ||५||
