पापणीत मिटल्या

पापणीत मिटल्या माझ्या

सागराची गाज गर्जते

दिल्या घेतल्या वचनांची

आजही आठवण येते

स्वप्न सोनेरी जीवनाचे

हळव्या क्षणी तरळते

गोफ जीवनाचा रेशमी

बंधनात लज्जित होते

भेटीगाठी जीवाशिवाच्या

गुलकंदापरि प्रीतीच्या

पापणीत मिटल्या माझ्या

आजही सुगंधित ताज्या

अचानक ताटातुटीची

उभारली भिंत दैवाने

डाव उधळला प्रीतीचा

सरी अश्रूंच्या नशिबाने

पापणीत मिटल्या माझ्या

अजूनही सख्या येतोस

संकेत जगाचे तोडूनी

मज असेच भेटावेस