Library
Profile
पांडुरंगाचे उत्तर
पांडुरंगाचे उत्तर
1 min
30.8K
पंढरीची वारी ।
स्तिमित जाहली ।
पाहत राहिली ।
अघटित ।।१।।
विचारू लागली ।
ती रुक्मिणीमाय ।
झाले असे काय ।
पांडुरंगा ।।२।।
धावत जे आले ।
पांडुरंग त्वरा ।
विचारी सत्वरा ।
रखुमाई ।।३।।
जे न झाले कधी ।
का झाला उशीर ।
पडला विसर ।
आषाढीचा ।।४।।
संतांचा मेळावा ।
चंद्रभागे काठी ।
झाली असे दाटी ।
सज्जनांची ।।५।।
गेला होता कुठे ।
आता तरी सांगा ।
थोर झाल्या रांगा ।
भाविकांच्या ।।६।।
बाप तो जगाचा ।
जड आवाजात ।
सजल नेत्रात ।
उत्तरला ।।७।।
भक्त एक माझा ।
बाप शेतकरी ।
होती त्याच्या घरी ।
अंत्यविधी ।।८।।
क्रूर व्यवस्थेने ।
दिली त्याला फाशी ।
आत्महत्या त्यासी ।
प्रचारिले ।।९।।
त्यालाच पाहाया ।
धावत जो जाई ।
मीही नष्ट होई ।
त्याच्यासवे ।।११।।
त्याच्या सरणात ।
काहीसा जळून ।
काहीसा रडून ।
परतलो ।।११।।
