म्हणून...

तू उधार देशील का मला 

तुझ्या अंगणात कोसळणारा तो पाऊस

कारण प्रेमाचे अंकुर जे उगवून आलेत 

नकळत माझ्याही

त्यांना मला जपायचं आहे....

तुझ्या आठवणींच्या थव्यांनाही आता

प्रेमात अखंड बुडून जायचं आहे....

रानोमाळ हिंडणाऱ्या मनपाखराला

तुझ्या प्रेमाचं पावसाळी गाणं गायचं आहे...

आठवणींची वाट तुडवून 

मी रोज पोहचतो तुझ्या मनापर्यंत

तुझ्या मनालाही मला सोबत घ्यायचं आहे...

उन्हात झिरपत गेलेल्या 

भूमिगत ओलाव्यालाही आता

खळखळून वहायचं आहे....

तू, मी आणि पाऊस

विलक्षण हे नातं, 

मनोमन जगायचं आहे...

तुझ्यासवे मला एकदा 

या पावसात चिंब होऊन भिजायचं आहे....

म्हणून....