लॉक
लॉक
' लॉक ' करून ठेवता आल्या पाहिजेत ,
काही गोष्टी , आवर्जून ;
पहिल्या प्रेमाचा सुगंधी गंध अन्
ओझरते चुंबन .
' लॉक ' करून ठेवता आली पाहिजे ,
पहिल्या रात्रीची मदहोशी ;
पहिल्या बाळाचा ' टया टया'आवाज कानाशी .
' लॉक ' करून ठेवता आली पाहिजे ,
चेहऱ्यावर येणारी सुरकूती ,
पैसा , सत्ता , प्रसिध्दी , दूर जातेय की काय ?
याची भीती.
' लॉक ' करुन ठेवता आल्या पाहिजेत ,
पाहिजे असलेल्या , अन् नसलेल्याही गोष्टी ..
पाहिजेत त्या
खोलुन , हाताळून पुन्हा जपून ठेवण्यासाठी ,
अन् -
नको असलेल्या ,
कधीच समोर न येण्यासाठी ..
बाईच्या अंतर्मनातील खोल कप्प्यात
कोंडून ठेवलेल्या प्रियकराच्या ,
आठवणींसारखी .