कविता

नुसते यमक जुळविल्याने

नाही होत कविता,

त्यासाठी फुंकावा लागतो प्राण ,

अन् वाहाव्या लागतात शब्दांच्या समिधा...

व्यक्त व्हावी कवितेतूनी ,

जीवनाची अथांग तृप्तता

नकोत शब्द खोटे परके ,

असावी त्यात दृढ सत्यता...

तिजकडे पाहताक्षणीच

लाभावी मनास शांतता

ऐकूनी मधूर बोल तिचे ,

व्हावी सकल वेदनांची पूर्तता...

वादळास झुंजण्याची

वाचून यावी धैर्यता

काळजाला आर्त भिडावी ,

अशी असावी सच्ची कविता ...