कुणाची काय पर्वा*

*कुणाची काय पर्वा*

प्रश्न होता भाकरीचा वादळांची काय पर्वा

नाविकाला सागराच्या गर्जनांची काय पर्वा

तोडले नाते जगाने संकटांनी वेढलो मी

मी गुलाबी फूल झालो कंटकांची काय पर्वा

लाख झाले वार माझ्या भावनांवर विस्तवाचे

ऐरणीच्या मस्तकाला वेदनांची काय पर्वा

वाळवंटाच्या उन्हाने बहरले आयुष्य माझे

घामधारांनी नहालो सावल्यांची काय पर्वा

जीवनाच्या शर्यतीला जिंकण्याचे ध्येय आहे

कासवाची चाल माझी मग सशांची काय पर्वा

*पंकज कुमार उत्तम ठोंबरे*