जखमांची गाणी

त्या मिटून पाकळ्या अलगद, डोळ्यांच्या, गेला कोणी |

त्या दिल्या घेतल्या ओल्या, जखमांची झाली गाणी || 

ते वेडच होते वेड्या, श्र्वासांचे अडकत जाणे |

तव हात घेऊनी हाती, त्या धुक्यात चालत जाणे || 

ते घरटे आपण अपुल्या, प्रेमाने बांधियलेले |

त्या उबेत होते मारव, तू हळूच पांघरलेले || 

त्या शुभ्र तळ्याशी आपण, रंगांनी भरली दुनिया | 

त्या मिठीत तुझिया माझी, थबकली होती काया || 

ते गेले पडले सारे, क्षण अंधुक अंधुक झाले | 

आशांचे भोळे पंख, बघ क्षणात विखरून गेले || 

ती गेली दुनिया वाहून, राहिले कोवळे पाणी | 

त्या दिल्या घेतल्या ओल्या, जखमांची झाली गाणी ||