झुला बाई झुला

नागपंचमीचा सण

आला आला गं सयांनो

जाऊ नटूनी थटूनी

खेळायला गं सख्यांनो

कामे बिगीने उरका

हात चालवूनी वेगे

नैवेद्याचा थाट भारी

तबकात ठेवा सारे

करु पूजा नागोबाची

दूध लाह्या वाहूनिया

भावे नमन करुनी

आज कृतज्ञ राहू या

आज झुलू झुल्यावर

उंच जाई माझा झुला

मन हळवे होऊनी

जाई माहेर वाटेला

झुल्यावरी झूलताना

मन होई पिसापरी

दिसे मोद चहूकडे

दुःख काळजी विसरी

श्रावणाच्या झूल्यावरी

देहभान विसरावे

वाटे आज सखीसवे

उंच नभी विहरावे

भार मनाचा जाईल

विरुनिया वाऱ्यावरी

तृप्त मनाने जाऊ या

सखे खेळूनिया घरी