गीत माझे

नाही मी प्रतिभावंत ,

नाही मला संगीताची जाण ,

इतकेच मात्र ठाउक मला 

चेह-यावर खुलते हसू मुलांच्या , हीच माझ्या गीताची शान...

भैरवी , मल्हार , केदार , शिवरंजनी 

राग हे तर , फक्त नावापुरता 

मी मात्र जाणते , तो एकच माणुसकीचा राग ,

फुलवितो जो , रसिकांच्या मनातील बाग ...

ना कुठलेही शास्त्रशुद्ध प्रशिक्षण , 

ना पेटी तबल्याची साथ ,

इतकेच पण ठेवते भान मनात , 

माझ्या गीतातून व्हावी , शुभ्र चांदण्यांची बरसात ...

नाही कळत त्या क्लिष्ट संज्ञा 

सप्तक , षडज् , पंचम , निषाद 

इतकेच मात्र कळते मला , 

गीत माझे भिनूदे , प्रत्येकाच्या हॄदयात ...

नाही वाजविता येत टाळ

 नाही छेडता येत , सतार 

इतकेच मात्र ठाउक मला ,

 आर्त खोलवर रूजावे , माझ्या गीतातील भाव अलवार ...

नाही कळत मला आलाप ,

नाही कळत सूरताल ,

इतकेच मात्र ठाउक मला ,

माझ्या गीतातून पेटू दे , राष्ट्रभक्तीची शाश्वत मशाल ...