एक रात्र पावसाची
एक रात्र पावसाची
बेधुंद अशी ती रात्र मुसळधार पावसाची
शहारल्या क्षणांची बेभान वादळाची
गेली करुनी चिंब सर रातच्या घनांची
पुन्हा एकदा बरसली ती रात्र पावसाची!!१!!
सुटला असा तुफान सोसाट्याचा वारा
अंधाऱ्या राती नभी मेघ आले दाटून
शहारले अंग जोमाने दाटला हवेत गारवा
कडकडाट नभांतरी जाई काळीज फाटून!!२!!
अजूनही घुमतो कानी तो नाद गर्जनांचा
लाजुनी ती सौदामिनी घेई आडोसा घनाचा
नकळत अंधाराला चिरत अशी जोमाने
नुसता तांडव करी नभी गर्जनांचा!!३!!
ओथंबूनी बरसला मेघ वर्षाव भूवरी
दरवळला सुंगध सुवासिक मातीचा
लाही लाही झालेल्या त्या देहाला
शांत करी स्पर्श होऊन त्या थेंबाचा !!४!!
कोलमडले सारे जे उभे होते भूवरी
सावराया नाही मिळाली उसंत क्षणाची
अजून ही मनात काहूर दाटते भीतीचे
अशी एक होती रात पावसाची!!५!!