चैत्र पालवी फुटली

वसंत येता वसुंधरेवर

नवी चैत्र पालवी फुटती

गुलमोहराच्या लाल सुमनी

भ्रमर बसुनी मध घेती ||

सौंदर्याने बहरूनी सृष्टी

साखर झोपेतून उठली

फाल्गुनाच्या रंगांनी न्हाऊन

चैत्र चैतन्य जागून नटली ||

फुलला निसर्ग दाहीदिशा

मोहरली पहा अमराई

हिरव्या हिरव्या पानातूनी

मोहक सौंदर्याची दुलई ||

सृष्टीच्या तनुवरती फिरवली

जादूची कांडी ऋतुराजांनी

तार सप्तकामधली तार छेडीत

कोकिळेची कुहू -कुहू कानी ||

नववर्षाची चाहूल लागी

गृहिणींची लगबग न्यारी

आमरस,पुरणपोळी नैवेद्या

उंच गुढी उभारी भारी ||