भुपाळी 🌺

रवी कोवळा पूर्व दिशेला बघ तो जागा झाला

आळवण्या आला तुजला उठ उठ रे नंदनंदना .... || धृ ||

झाडांचा बघ झोका केला राघु त्यावर झुलू लागला

भोळी मैना तुला बोलवी अंगणात खेळण्याला

किलबिल संगीत पक्षी गाती तुला साद देण्याला

उठ उठ रे नंदनंदना.. || 1 ||

गाय हंबरे माय पिलांची ऐक राजसा धार दुधाची

मुख तव पहाण्यासाठी वासरेही तगमग करती

उभा सवंगडी धाव नदीची जा लगेच पोहण्याला

उठ उठ रे नंदनंदना.....|| 2 ||

सडा संमार्जन धूप दीप तो निरांजन सजला

घराभोवती गोप गोपिका जमल्या मुखदर्शनाला

उठ मुकुंदा,उठ उठ रे कृष्णा पाहू नको अंत ग्वाला

उठ उठ रे नंदनंदना...|| 3 ||

उठ राजसा नंदकिशोरा राग मला आला

दही, दुध, लोणी कशास ठेवू तुला भरवण्याला

तुच एकटा नाही लाडका देईन अवघ्या गोकुळाला

उठ उठ रे नंदनंदना...|| 4 ||