बाप

हात धरुन शिकवले चालावयास

हजार वेळा मी धडपडले रस्त्यात

आज मात्र खंबीर उभी मी

बाबा तुमचाच वाटा आहे सगळ्यात ||

कडेवर घेऊन फिरवले मला

कधीतरी हात दुखला असेल तुमचा

तरीही कधी नाही टाळले

विचार केला फक्त माझ्या मनाचा ||

कामासाठी बाहेर गावी जायचात

रोज तुमची मी वाट बघायची

परतल्यावर यायची मी धावत खरी

आनंद मात्र मनातच ठेवायची ||

शिक्षण संपले लग्न ठरले

ओलांडला उंबरा तुमच्या घराचा

खूप त्रास दिला बाबा तुम्हाला

तरीही नाही चढला पारा तुमच्या रागाचा ||

सासरी निघताना होते ओठावर हसू

डोळ्यात होते दु:ख पाश तुटल्याचे

बाबा तुमच्या सहनशक्तीला प्रणाम

नंतर कळाले अश्रूंचा बांध फुटल्याचे ||

माझ्या लग्नाला झाली वर्षे अठरा

हट्ट आईस्क्रीम खिशात ठेवण्याचा

काहीच नाही विसरले बाबा

आहे पुरावा सगळे हट्ट पुरवल्याचा ||

नोकरी संपली तरीही करता कष्ट

तुमच्या स्वाभिमानाला माझा सलाम

नाही पसरले हात कधीही

याचाच मला आहे अभिमान ||

प्रेम तुमच्यावर अबोल माझे

अथांग आहे सागरापरी

आज मांडते शब्दांमधूनी

साथ द्या मला घेण्या भरारी ||

एक इच्छा आहे अधुरी

एकदा तरी जवळ घ्यावे

पाठीवरुन हात फिरवुनी

आहे पाठीशी एवढेच म्हणावे ||