अरुणोदय
अरुणोदय
दुर्दैव आमुचे मृत्यूचे राजकारण येथे कधीच संपत नाही
पेटत्या चिता दाखवणाऱ्यांना हसरे चेहरे दिसत नाहीत |
येथे कुणाला पडली नाही काळजी मरणाऱ्या माणसाची
येथे काळजी यांना सतावतेय निवडणुकीच्या निकालांची |
ऑक्सिजनची कमतरता येथे रुग्णांची चिंता बनली आहे
प्रेताच्या टाळूवरचे लोणी खाणारांना ही संधी वाटत आहे |
रुग्ण सेवा हीच ईश्वरसेवा मानणारे डॉक्टर असंख्य आहेत
महामारी ही संधी समजून लुटणारी रुंग्णालये अल्प आहेत |
इंजेक्शन मिळत नाही म्हणून कुणी तडफडून मरत आहेत
बनावट इंजेक्शन विकणारे मात्र येथे मोकाट फिरत आहेत |
रुग्णसेवा करणाऱ्यांना येथे प्रसिद्धी कोणी कधी देत नाही
कारण त्यांच्या बातमी मुळे टीआरपी कुणाचा वाढत नाही |
आलं अंगावर की ढकल दुसऱ्यावर ही प्रवृत्ती वाढत आहे
आलेल्या संकटाला सामोरे जाणाऱ्या नेतृत्वाची कमी आहे |
अशी अनेक संकटे आली गेली मानव समाज टिकून आहे
चोर लुटारु लोकांपेक्षा येथे सज्जनांची संख्या जास्त आहे |
हेही दिवस निघून जातील याची आम्हा सर्वाना खात्री आहे
रात्र संपताच अरुणोदय होतो हा तर सृष्टीचा नियम आहे ||