विचित्र विडंबना

सरला वर्षा ऋतू जरी पाऊस अजून आहे

दोन घोट पाण्यासाठी कोठे पायपीट सुरु आहे ।

आश्र्वासने जी पोकळ खरी मानून बसलो

दोन वेळच्या भाकरीची भ्रांतही अजून आहे ।

विश्र्वस्त शिर्डी तिरुपतीचे संपत्ती मोजून थकती

देवघरातील समईमधे ना वात ना तेल आहे ।

कोठारे या देशातील धनधान्याने भरुन गेली

लेकरे असंख्य येथील तरी ऊपाशी झोपून गेली ।

जगतोय या जगी मी मरणेही महाग झाले

ना विषही स्वस्त येथे ना विहीरीत पाणी आहे ।

तक्रार कुणी का करावी सर्व सुरळीत आहे येथे

फासून शेंदूर दगडास आम्ही देव बनवला आहे ।

अजूनही या काळजातून धडधड ऐकू येत आहे

रक्त या काळजातील मात्र कधीच गोठले आहे ।