अजरामर प्रीत

हृदय स्पंदनी रमते भूतकाळात

अधीरता वाढते माझ्या मनाची

युगानूयुगे साक्षी हे चंद्र सूर्य तारे

अजरामर प्रीत राधा-कृष्णाची

कालिंदीच्या डोहाचे नीळे पाणी

भेटीचे तरंग जणू गातात गाणी

गर्द हिरव्या वनराईत मनमोहन

ऐकवितो मनमोहक अमृतवाणी

कधी तन होते लाजरी राधिका

मधुर बासरीने मन होई बेभान

ओढ लागते नयन कलिकांना

सावळ्यास भेटण्याची रे तहान

तृप्त होऊनी दर्शनाने हे तनमन

श्वास ही अर्पण तुज रे मधुसूदन

जन्म-जन्मांतरीची भक्ती अतूट

कृष्ण नामाने पावन झाले जीवन