अगतिकता......
अगतिकता......
पाठीवरी ओझे दिसे
पण दप्तराचे नाही
आशाळभूत नजरही
कधी शाळेकडे पाही
माणुसकीच्या झऱ्याला
पाझर फुटला नाही
गरिबीच्या ओझ्याचा
झरा आटला नाही
भाऊ-बहिण दोघांनाही
गरिबीचे ओझे पेलवे नाही
पण जिंकण्याची अजून
त्यांची ताकद हरली नाही
उचलूनी भार सहाय्याने
चिमुकला हात थकला नाही
घरा हातभार लावतांना
पाठीचा कणा वाकला नाही
अगतिकतेचा हा इशारा
कुणास कळला नाही
लेकरास या मदतीचा
एक हातही वळला नाही
शोकांतिका ही समाजाची
कधी संपणार नाही
बालमजूरीचा अभिशाप
येथे कमी पडणार नाही
ढोंग अमाप दानाचे
सत्यात फारसे नाही
कळवळा फक्त माध्यमांवर
हा दानाचा आरसा नाही