लाइब्रेरी
प्रोफाइल
आली पंचमी पंचमी
आली पंचमी पंचमी
1 min
373
आली पंचमी पंचमी
ओल्या श्रावण सरीत
इंद्रधनुचा टांगला
झोपाळा घनी नभात
आली पंचमी पंचमी
जाईन मी ग माहेरा
मैत्रीणी सह फुगडी
खेळ रंगेल गहिरा
आली पंचमी पंचमी
झोका चढवू झोकात
आम्ही साऱ्या ग मैत्रीणी
मोती आमुच्या नाकात
आली पंचमी पंचमी
सण हा नागराजाचा
त्याचा मांडला उत्सव
का फक्त एका दिसाचा ?
आली पंचमी पंचमी
शोधू कुठे मी वारुळ ?
पुजा करण्या नागाची
माझ्या मनाचं देऊळ
आली पंचमी पंचमी
घन खाली उतरला
रिमझिमता पाऊस
तनी मनी पसरला
आली पंचमी पंचमी
मी पोहचले माहेरा
येई साजणाची याद
दूर देशी तो राहिला
