നാളേക്കൊരുത്തണൽ...
നാളേക്കൊരുത്തണൽ...
നെഞ്ചിൽ കൈവച്ചു പറയുമോ സഖേ,
ഇന്നത്തെ ഈ ഭീകരമാം തണ-
ലില്ലാതാവാൻ താങ്കളുടെ പങ്കൊ-
രിയ്ക്കലും ഉണ്ടായിട്ടില്ലെന്ന്... !
മലമുകളിൽ ആവരണമായ്
വിതാനിച്ചുനിന്ന മരങ്ങളാകും തൊപ്പിക്കുടകളെല്ലാം
വെട്ടിയരിഞ്ഞു വീഴ്ത്തിയതിൽ
നിങ്ങൾക്കും പങ്കില്ലെന്ന് നെഞ്ചിൽ
കൈവച്ചുപറയുവാനാകുമോ സഖേ... !
തണ്ണീർത്തടങ്ങളാകും വയലേലകളെല്ലാം
ഭൂമാഫിയകൾക്കായ് മണ്ണിട്ടു നികത്തി,
ഘോരമാം വാർക്കമന്ദിരങ്ങൾ
പണിതുയർത്താൻ, നിങ്ങളും
കൂട്ടുനിന്നില്ലെന്ന് നെഞ്ചിൽ കൈവച്ചു പറയുവാനാകുമോ സഖേ... !
പിന്നെ, ഈതൊന്തരവുകൾ നിറഞ്ഞ
പ്രകൃതിയുടെ ദുരന്തങ്ങൾ കണ്ട്
ആയൂസ്സിൻ ഏണികൾ വെട്ടി
നുറുക്കപ്പെടുന്നതുകണ്ട്
ആധികൾകയറിയെങ്കിൽ
മാനവാ നട്ടുവളർത്തൂ നാളെക്കൊരു
തണൽ,പിന്നെ നെഞ്ചിൽ കൈവച്ചുപറയൂ, വളർത്തി വലുതാക്കാമെന്ന്... സഖേ... !