കവിത :- പ്രണവധാർഷ്ട്യം. രചന :- ബിനു. ആർ.

കവിത :- പ്രണവധാർഷ്ട്യം. രചന :- ബിനു. ആർ.
പ്രകൃതി വിദ്വേഷവിഷമായ്മദിച്ചരാവിൽ
പ്രണവം ധാർഷ്ട്യത്തിൽ ചിരിച്ചുമറിയവേ,
പ്രണവാകാരം മറിച്ചിട്ടട്ടഹസിച്ച
മർത്യനെ മഴകൊലവിളിയിൽ തകർത്തുരസിച്ചു.
പ്രകൃതിതൻ ഊരാകുടുക്കിലെല്ലാം
പ്രപഞ്ചശക്തികൾ നീരാടിനിറയവേ, കറുത്തമാനവന്റെ ദുഷ്‌ചെയ്തികളെല്ലാം
കരിഞ്ഞകോട്ടിട്ടപോൽ കരിമേഘങ്ങളായ്.
തകർത്തുപെയ്ത പേമാരികൾക്കിടയിൽ
തനതു കോലങ്ങൾ കരികെട്ടിയാടി- ത്തിമിർക്കവേ,തകർന്നുപോയ് മർത്യന്റെകാതരസ്വപ്‌നങ്ങൾ,
കാലക്കേടിൻമഹാമാരികൾ
തപിപ്പിക്കും രാപ്പനികളായ്.
യന്ത്രങ്ങളിളക്കിമറിച്ച മൊട്ടക്കുന്നുകൾ മുഷിഞ്ഞമഴയുടെ താളപ്പിഴകളിൽ കൊണ്ടുംകൊടുത്തും നേടിയഉപജാപങ്ങൾ കൊടുമ്പിരിമഴയിൽ തകർത്തൊലിച്ചുപോയ്‌.
-ബിനു. ആർ